HATAW! D'yaryo ng Bayan hatawtabloid.com
ARESTADO ang dalawang lalaking nagpanggap na kawani ng Department of Interior and Local Government (DILG) at nanghihingi ng donasyon sa local officials para sa rehabilitasyon ng Marawi City, sa Makati City nitong Huwebes.
Nakapiit sa detention cell ng Makati City Police ang mga suspek na sina Ricardo Simbulan, 63, at Mitus Sampayan, 39, ng Brgy. Pembo, ng nasabing lungsod.
Ayon kay Makati City Police chief, Sr. Supt. Jerry Umayao nakatanggap ng reklamo ang tanggapan ni DILG OIC Catalino Cuy, na ginagamit ang kanyang opisina sa panghihingi ng mga suspek ng donasyon sa local officials.
Bunsod nito, nagkasa ang mga awtoridad ng entrapment operation na nagresulta sa pagkakadakip sa mga suspek dakong 2:00 pm habang kinukuha mula sa Palawan Pawnshop sa JP Rizal Extension, Brgy. Comembo ng lungsod, ang donasyon na kanilang hinihingi.
Sasampahan ang mga suspek ng kasong swindling at extortion.
ni JAJA GARCIA
