HATAW! D'yaryo ng Bayan hatawtabloid.com
NAGHAIN ng kasong paglabag sa Anti-Wire Tapping Law sa Pasay City Prosecutor’s Office si Justice Secretary Vitaliano Aguirre II laban kay Senadora Risa Hontiveros sa Pasay City, kahapon ng umaga.
Dumating si Aguirre sa Hall of Justice ng Pasay dakong 8:00 am upang sampahan ng kasong paglabag sa Republic Act (RA) 4200 o Anti-Wire Tapping Law si Hontiveros.
Nanumpa si Aguirre sa harap ni Assistant Prosecutor Johari Tolentino base sa kanyang inihaing complaint affidavit laban kay Hontiveros.
Nag-ugat ang paghahain ng kaso ni Aguirre makaraan ilabas ni Senador Hontiveros ang retrato ng kalihim na may ka-text habang dumadalo sa Senate hearing.
Makikita sa larawan na ka-text ni Sec. Aguirre si dating Congressman Jing Paras at ipinamamadali ng kalihim ang mga kaso laban kay Hontiveros.
Tatlong bilang ng paglabag sa Anti-Wire Tapping Law ang isinampa ng kalihim laban sa senadora.
Una rito ang pagkuha ng kanyang retrato, ikalawa ang pagpapasuri ni Hontiveros sa ilang eskperto na authentic ang retrato at cellphone ni Aguirre.
Ang ikatlo ay dahil sa pagpresenta ng senadora ng retrato sa kanyang privilege speech na napanood sa buong mundo.
Sa paglabas ni Aguirre sa tanggapan ni Assistant Prosecutor Tolentino, hinamon niya si Hontiveros na ilabas ang photographer na kumuha ng kanyang retrato.
Sinabi ng kalihim, nakatakda rin siyang maghain ng reklamo laban sa senadora sa ethics committee ng Senado.
Aniya, magsasampa rin siya ng hiwalay na civil case sa Pasay City Regional Trial Court (RTC) laban sa senadora.
(JAJA GARCIA)
