HATAW! D'yaryo ng Bayan hatawtabloid.com
BUBUHUSAN ng opensiba ng militar ang New People’s Army (NPA) matapos ang krisis sa Marawi City.
Sa kanyang talumpati sa ika-anim na pagbisita sa Marawi City kahapon, tiniyak ng Pangulo na ang NPA naman ang pagbabalingan ng operasyong militar dahil sa pinaigting ng rebeldeng grupo ang opensiba laban sa tropa ng pamahalaan at pag-atake sa mga negosyo.
“Kung medyo tatagal ako ng konti, ‘pag di ako binaril sa likod. Tatapusin natin talaga ito,” anang Pangulo na ang tinutukoy ang NPA.
Paliwanag ng Pangulo, panay pangingikil ang inaatupag ng NPA at kapag hindi sila binigyan ng negosyante o kompanya ay sinusunog nila ang mga kagamitan ng mga ito sa negosyo.
Ayon kay Presidential Spokesman Ernesto Abella, ang mga pag-atake ng NPA sa nakalipas na mga araw ay nagpalakas sa pagdududa sa kaha-hantungan ng peace talks.
“The NPA attacks in Sarangani, South Cotabato, Surigao del Sur, Palawan and Masbate fuels the public’s doubt about the talks with the group. The government will undertake appropriate steps to deal decisively with these forces that seem to have lost their sense of nation-building,” ani Abella sa press briefing kahapon.
Matatandaan, ipinatigil ni Duterte ang peace talks noong Hulyo nang utusan ng Communist Party of the Philippines (CPP) na labanan ang idineklarang martial law sa Mindanao bunsod ng Marawi crisis.
ni ROSE NOVENARIO
