2 sekyu sugatan sa boga (Resbak ng selosong ex-lover)

HINIHINALANG selos ang ugat nang pagbaril ng isang lalaki sa dating kinakasamang lady guard at isa pang kapwa guwardiya sa Taguig City, kamakalawa.

Inoobserbahan sa Rizal Medical Center ang mga biktimang sina Mary Grace Labawan, 32, lady guard sa Samsung Warehouse, residente sa 59 ML Quezon St., Purok 1, Brgy. New Lower Bicutan, Taguig City, habang may tama ng bala sa kaliwang paa si Al Monicit Mayor, 27, guwardya ng Magsaysay Rustan Warehouse, residente sa Block 2, Lot 5, SS Bridge, Brgy. Western Bicutan, Taguig City.

Samantala, tinutugis ng pulisya ang suspek na dating kinakasama ni Labawan, na si Arthur Masibay, 39, karpintero, taga ML Quezon St., Purok 1, Brgy. New Lower Bicutan, Taguig City.

Ayon sa imbestigasyon ng Taguig City Police, dakong 10:42 pm nang maganap ang pamamaril sa Santo Niño, Brgy. Western Bicutan ng lungsod.

Habang magkasamang naglalakad ang dalawang biktima nang sumulpot ang suspek sakay ng motorsiklo at pinagbabaril ang dalawa saka tumakas.

Hinala ang pulisya, posibleng nagselos ang suspek kaya’t pinagbabaril ang dalawang biktima.

(JAJA GARCIA)