Reklamo ni Faeldon vs Trillanes ibabasura (Sa Ethics Committee) — Drilon

TILA mauuwi sa basurahan ang reklamong inihain ni dating Bureau of Customs (BoC) Commissioner Nicanor Faeldon laban kay Senador Antonio Trillanes sa Senate Ethics Committee na pinamumunuan ni Senador Tito Sotto.

Ito ay makaraan magkasundo ang mga miyembro ng komite na huwag dinggin ang reklamo ni Faeldon dahil sa kabiguang humarap sa pagdinig ng Blue Ribbon Committee ukol sa kontrobersiyal na P6.4 bilyong ha-laga ng ilegal na droga.

Ayon kina Sotto at Senador Franklin Drilon, paano nila diringgin ang reklamo kung mismong sa kanilang proseso sa Senado, ay ayaw dumalo at makipagtulungan ni Faeldon.

Si Faeldon ay kasalukuyang nakadetine sa Senado makaraan i-contempt ng komite dahil sa paninindigang hindi haharap sa imbestigasyon hanggang naroroon sina Trillanes at Senador Panfilo “Ping” Lacson na pawang mga miyembro ng komite.

Binigyang-linaw ni Drilon, hanggang hindi natututo si Faeldon na kilalanin ang Senado ay maninigas umano ang kanyang reklamong inihain.

Tinukoy ni Drilon, kung talagang patuloy na magmamatigas si Faeldon na hindi makipagtulungan sa Senado ay makukulong ang dating commissioner hanggang matapos ang 17th Congress.

“Para sa akin wala pong karapatan na magdemanda sa ethics committee si Mr. Faeldon hanggang hindi niya inirerespeto ang proseso ng Blue Ribbon Committee, dahil sa sinabi niya na hindi siya haharap sa Blue Ribbon hanggang nandiyan si Sen. Lacson at Sen. Trillanes. Talagang dapat siyang i-cite in contempt,” ani Drilon.

(NIÑO ACLAN)