HATAW! D'yaryo ng Bayan hatawtabloid.com
ANIM preso ang sugatan, kabilang ang isang comatose, makaraan ang naganap na riot ng dalawang gang sa loob ng New Bilibid Prison (NBP) sa Muntinlupa City, nitong Linggo ng umaga.
Hindi pa pinangalanan ang mga biktima, kabilang ang isang comatose makaraan paluin ng martilyo sa ulo. Patuloy siyang inoob-serbahan sa Infirmary ng NBP.
Sa imbestigasyon, dakong 9:00 am nang maganap ang insidente sa loob ng Dorm 13-C ng Quadrant 3 sa NBP.
Nangyari ang sagupaan ng magkalabang grupo makaraan maaktohan ang isang miyembro ng Sputnik gang na ninanakawan umano ang isang miyembro ng Batang Cebu na nagsumbong sa kanyang ka-grupo.
Ayon sa ilang bilanggo, unang nagresbak ang Sputnik Gang at sinalakay ang Batang Cebu gamit ang isang sumpak at iba pang matatalas na sandata.
Hanggang magpang-abot ang dalawang grupo sa loob ng Dorm 13 sa Quadrant 3 na ikinasugat ng anim na preso.
Bagama’t halos araw-araw nagsasagawa ng “Oplan Galugad” ang mga tauhan ng Bureau of Corrections (BuCor) sa loob ng NBP ay mayroon pa rin nakalulusot na mga armas at patalim.
Sa ngayon, hindi pa malinaw kung paano nagkaroon ng sumpak sa loob ng kulungan.
Pansamantalang itinigil ang dalaw habang patuloy ang imbestigasyon sa insidente.
(JAJA GARCIA)
