HATAW! D'yaryo ng Bayan hatawtabloid.com
IPINADLAK ang sampung bus terminal sa kahabaan ng EDSA, Quezon City kahapon, ng Metropolitan Manila Development Authority (MMDA), kaugnay sa hindi pagsunod sa panuntunan ng ahensiya at paglabag sa regulasyon ng Business Permit and Licensing Office (BPLO) ng lungsod.
Nanguna sa operasyon si MMDA Chairman Danny Lim, katuwang ang Land Transportation and Franchising Regulatory Board (LTFRB), at Quezon City BPLO dakong 1:30 pm.
Ang mga isinarang terminal ay kinabibilangan ng Jac Liner, Philtranco, DLTB Company, Five Star Liner, Pangasinan Cisco, Golden Bee, First Nort Luzon, Amihan Bus Lines, Lucena Lines at ES Transport terminal, pawang nasa kahabaan ng EDSA, Quezon City.
Ayon sa MMDA chief, ipinadlak nila ang naturang mga terminal dahil sa hindi pagsunod sa ipinatutupad nilang “Nose In, Nose Out policy” at ordinansa ng local government unit (LGU).
Kinompirma ng opisyal, kanilang pababantayan sa mga tauhan ng ahensiya ang mga ipinadlak na terminal upang hindi muling magamit.
Kamakailan, apat na bus terminal sa EDSA, Pasay City ang ipinadlak ng MMDA dahil sa paglabag sa ipinatutupad na ordinansa at patakaran.
(JAJA GARCIA)
