HATAW! D'yaryo ng Bayan hatawtabloid.com
APAT katao na hinihinalang sangkot sa ilegal na droga ang pinagbabaril hanggang mapatay ng anim hindi kilalang suspek sa loob ng isang bahay sa Brgy. Old Balara, Quezon City, kamakalawa ng gabi.
Sa ulat kay Quezon City Police District (QCPD) director, Chief Supt. Guillermo Lorenzo T. Eleazar, mula sa Criminal Investigation Detection Unit (CIDU), ang mga napatay ay kinilalang sina Ignacio Yutero, 40, construction worker; alyas Jenifer Taba, kapwa ng Purok 2, Area 5, Laura St., Brgy. Old Balara; alyas Loloy, at alyas Joey, parehong dayo sa lugar.
Sa imbestigasyon ni PO3 Jerome Dollente ng CIDU, dakong 11:10 pm nang mangyari ang insidente sa bahay ni Yutero.
Ayon sa ilang mga kapitbahay, nakarinig sila nang magkakasunod na putok ng baril mula sa bahay ni Yutero.
Pagkaraan, nakita nila ang anim lalaking armado ng baril na pawang naka-bonnet habang palabas ng bahay ni Yutero, at mabilis na tumakas lulan ng isang van na walang plaka.
Nang pasukin ang bahay ni Yutero, tumambad sa mga barangay tanod ang mga duguang biktima. (ALMAR DANGUILAN)
