Beteranang aktres, nanggigising ng mga co-star sa dis-oras ng gabi para makipag-throw lines

INIIWASAN na palang sagutin ng kanyang mga co-star ang tawag ng isangbeteranang aktres lalo’t kung dis-oras ng gabi.

At bakit? Ayon sa tsika, magugulat na lang daw ang mga co-star niya sa palaging bungad nito sa kanila sa telepono, ”Anak, hindi kasi ako makatulog, eh. Mag-throw lines tayo para ‘pag taping naMnatin bukas, eh, memoryado na natin ang mga linya natin. Siguradong matutuwa si direk niyan!”

Noong una raw, para hindi na lang mapahiya ang aktres ay sinasakyan na lang ng mga co-star niya ang kanyang “trip.”

Pero dumating na raw sila sa point na kahit ring ng ring ang kanilang cellphone ay deadma na sila sa tawag ng hitad.

Kinabukasan na lang sasabihin ng mga ito ang dahilan kung bakit hindi nila nasagot ang tawag ng aktres, ”Ah, eh, tita, pasensiya na po kayo. Pagod na pagod po kasi ako pagdating ng bahay, nakatulog po ako agad.”

Pero ang totoo’y gising na gising pa raw ang mga ito, na umiiwas na lang makipag-throw lines sa beteranang aktres na itago na lang natin sa alyas na Regina Paredes.

(Ronnie Carrasco III)