Jake Cuenca, binigyan ng bagong bihis si Lizardo

MARAMI ang namangha sa bagong mukha at hitsura ni Lizardo, ang kalabang mortal ni Flavio sa Ang Panday, entry ng CCM Creative Productions Inc., sa 2017 Metro Manila Film Festival at ididirehe ni Coco Martin.

Gagampanan ni Jake Cuenca ang karakter ni Lizardo sa Ang Panday. At sa retratong ibinahagi sa amin ni Eric John Salut ng Dreamscape Entertainment, natuwa kami sa bagong bihis ni Lizardo. Modern Lizardo kung aming tawagin.

Ayon kay EJ, nagsimula nang mag-shoot si Jake noong Biyernes.

Maging sa Instagram account ni Jake, ibinahagi rin niya ang pagsisimula ng kanyang pagsabak sa Ang Panday at ang bagong hitsura ni Lizardo.



Sa caption, inilagay ni Jake na, @juancarloscuenca, “Pure evil… First day of filming for #angpanday . My army of darkness and I say hello. #lizardo.”

Ani Jake, handa na siyang maka-showdown sa matinding bakbakan ang bida ng pelikula na si Coco na tiyak pahihirapan ng kanyang karakter.

Bago ang shooting, nagpasalamat si Jake na napasama siya sa Ang Panday. Aniya, hindi may magandang resulta ang hindi niya pagpapagupit ng buhok.

Sa isang panayam sa kanya ng abscbn.news.com, pinasalamatan din niya ang pambihirang pagkakataon na makakatrabaho ang iba pang malalaking artista.

Si Lizardo ay unang ginampanan ng beteranong kontrabidang si Max Alvarado sa orihinal na pelikula ni Fernando Poe Jr. at pagkaraan ay ginamapnan naman ni Phillip Salvador (2009) sa pelikula ni Ramon ‘Bong’ Revilla Jr..

SHOWBIZ KONEK – Maricris Valdez Nicasio