Saturday , March 15 2025

Konsehal ng Pasay patay (Sa ikalawang ambush)

SA pangalawang pagtatangka sa kanyang buhay, tuluyang binawian ng buhay ang isang konsehal ng Pasay City, at presidente ng Liga ng mga Barangay, makaraan paputukan ng isang suspek habang sakay ng kanyang wheelchair sa harap ng entrance ng SM Southmall sa Las Piñas City, nitong Sabado ng gabi.

Nalagutan ng hininga bago idating sa Asian Hospital & Medical Center ang biktimang si Borbie Rivera y Salazar, 39, residente sa 355 Protacio, Brgy.112 ng nasabing lungsod, sanhi ng mga tama ng bala sa ulo at katawan.

Nakaganti ng mga putok ang mga bodyguard ni Rivera sa suspek ngunit nakatakas nang sumakay sa isang Fortuner, habang ang isa pang suspek ay sakay ng isang motorsiklo.

Inaalam ng mga awtoridad kung nahagip ng mga CCTV camera ang plaka ng naturang sasakyan at ang motorsiklo sa pinangyarihan ng insidente upang matukoy ang pagkaka-kilanlan ng mga suspek.

Base sa ulat na ipinarating kay Southern Police District (SPD) director, Chief Supt. Tomas Apolinario, Jr., pinagbabaril ang konsehal sa harapan ng door no. 4 ng SM Southmall, sa Brgy. Almanza, Las Piñas City, sa kasagsagan ng sale ng mall dakong 8:30 pm

Dahil sa insidente, nagkaroon ng komosyon sa mall kaya’t pansamantalang sinuspendi ang operasyon nito, ngunit dakong 9:00 pm ay muling ibinalik sa normal ang operasyon makaraan imbestigahan ang insidente.

Napakaraming mamimili sa naturang mall dahil sa tatlong araw na bagsak presyo ng mga produkto nito.

“SM Southmall shooting is not robbery hold-up or terrorism. It’s purely crime of murder,” pahayag ni SPD Dir. Apolinario.

Ayon kay SPD Dir. Apolinario, magsasagawa ng joint investigation ang SPD at Las Piñas City Police sa ilalim ni chief of police, Sr. Supt. Marlon Balonglong.

Sinabi ni Apolinario, inaalam ng awtoridad kung kabilang si Rivera sa tinaguriang “narco-politician” at pinag-aaralan ang kanyang records at ang aniya’y sanhi ng pagkabilanggo ng biktima sa Makati City Jail, dalawa hanggang tatlong taon na ang nakalipas.

Matatandaan, hindi ito ang unang beses na tinambangan ang konsehal. Kalalabas lamang niya sa isang bar dakong 4:00 am noong 23 Hunyo 2017 nang pagbabarilin siya ng dalawang armadong lalaking nakamaskara at magkaangkas sa motorsiklo, na malubha niyang ikinasugat at ng isa niyang bodyguard, sa Harap ng Titans Z Club, sa Macapagal Boulevard malapit sa GSIS Complex sa Pasay City.

Kagagaling lang ng konsehal sa naturang club kasama sina Jomer Ruiz at Cyril De Gracia Arce, para sa isang pulong ng mga opisyal ng barangay, at sumakay siya at ang kanyang bodyguard sa puting Land Cruiser (NQH 896), nang paulanan ng bala ng armalite at kalibre. 45 baril ng mga suspek.

Naisugod agad sa San Juan De Dios Hospital ang biktima at ang kanyang bodyguard at nakaligtas sa naturang pamamaril.

Hinuli noong 16 Abril 2015 ng District Special Operations at Anti-Car Theft Units ng SPD sa pamumuno ni Supt. Lorenzo Trajano, si Konsehal Rivera na sakay noon ng gray Ford Mustang GT, sa Magallanes Interchange Makati City, sa bisa ng warrant of arrest na inisyu ni Makati Regional Trial Court (RTC) Branch 59 Judge Winlove Dumayas, dahil sa kasong murder.

Nakuha sa loob ng kanyang sasakyan ang ilang kalibre ng baril at mga bala.

Noong 24 Enero 2015, nasangkot si Rivera sa isang pamamaril sa Brgy. Pio Del Pilar, Makati City, na ikinamatay ng isang tao at ikinasugat ng siyam iba pa.

Sinasabing si Rivera ay kaalyado sa politika ni Pasay City Mayor Antonino Calixto.

(JAJA GARCIA)

About Jaja Garcia

Check Also

Arrest Shabu

Higit P1.2-M shabu nasamsam, 2 armadong tulak tiklo sa Bulacan

SA KAMPANYA laban sa ilegal na droga at baril, naaresto ng pulisya ang dalawang hinihinalang …

Antonio Carpio Sara Duterte Chiz Escudero

Carpio kay Chiz  
EBIDENSIYA PROTEKSIYONAN VS VP SARA

Antonio CarpioSara Duterte Chiz EscuderoKASUNOD ng panawagan ng 1 Sambayan na simulan  ng Senado ang …

031325 Hataw Frontpage

FPRRD ‘di biktima, kundi mga pinatay sa war on drugs — Solons

ni GERRY BALDO NANAWAGAN sa publiko ang dalawang lider ng Quad Committee ng Kamara kahapon, …

Robin Padilla Rodrigo Duterte Bong Go Philip Salvador

Robin mapanindigan kayang samahan si Digong?;  Ipe emosyonal

PUSH NA’YANni Ambet Nabus MULI na namang nahahati ang showbiz world nang dahil sa mga …

TRABAHO Partylist nanawagan nang mas malawak na PWD inclusivity sa trabaho

TRABAHO Partylist nanawagan nang mas malawak na PWD inclusivity sa trabaho

BILANG tugon sa mga hamon na kinakaharap ng persons with disabilities (PWDs) sa paghahanap ng …

Leave a Reply

Your email address will not be published. Required fields are marked *