4 motorcycle riders sumemplang, sugatan (Graba nagkalat sa kalsada)

APAT katao ang sugatan makaraan sumemplang habang minamaneho ang kani-kanilang motorsiklo dahil sa nagkalat na graba sa kalsada sa Roxas Boulevard, Pasay City, kahapon ng madaling-araw.

Isinugod sa Pasay City General Hospital ang mga biktimang sina Raymond Canalda, 32; Rannie Guevara, 19; Abdul Mohammad, Jr., 32, at Joel Graciano, 27, pawang motorcycle rider.

Sa imbestigasyon ng Pasay City Traffic Bureau, dakong 12:00 am nang mangyari ang insidente sa Roxas Boulevard northbound.

Galing ang apat rider sa Cavite at patungo sa Maynila habang sinusundan ang isang kotse at apat na dump truck.

Ngunit bumukas ang pinto ng isa sa mga dump truck at tumapon sa kalsada ang kargang mga graba na may halong malalaking bato.

Bunsod nito, sumemplang ang apat motorsiklo naging dahilan ng pagkakasugat ng mga biktima.

(JAJA GARCIA)