HATAW! D'yaryo ng Bayan hatawtabloid.com
BAGONG theme sa bawal na gamot.
Ipinarinig sa amin ni direk Dinky Doo ang kantang Bagong Ako. Ito ang theme song ng pelikula na ii-introduce ang Star Music artist na si LA Santos, sa DAD: Durugin Ang Droga at acting debut din ng Soul Siren na si Nina.
Hindi naman kaila na sa isang madilim na bahagi ng buhay ni direk Dinky eh, nakaulayaw din niya ang droga. Kaya nga maraming istorya ang makikita sa kanilang pelikula.
Kaya naman ang serbisyo ng mahusay na songwriter na si Vehnee Saturno ang humabi ng liriko at musika ng kanyang theme song.
Kung ang Bawal na Gamot ni Willie Garte ang itinuturing na national anthem tungkol sa bawal na gamot, sa bagong kantang ginawa ni Vehnee para sa DAD eh, may bagong kantang kukurot sa puso ng mga music lover.
Ang DAD ay mapapanood na sa Setyembre 13, sa inyong paboritong mga sinehan na pinagbibidahan nina Allen Dizon, Jeric Raval, Alma Concepcion, Jackie Aquino, Efren Reyes, Sharmaine Suarez, Natasha Ledesma, Rey ‘PJ’ Abellana, Jeffrey Santos, at Renan Ponce Morales.
Ayon kay direk Dinky, isang advocacy film ang DAD na naglalayong makatulong at magbukas ng isip sa mas marami pang taong lulong dito, lalo na sa mga kabataan. Nagsimula ng mag-ikot sa iba’t ibang paaralan all over the country ang pelikula, pati na sa mga rehab center na, more than the material and the physical help, ang spiritual gift ang ibinabahagi nila sa mga naroroon.
HARDTALK – Pilar Mateo
