NCRPO handa sa SONA

HANDA ang puwersa ng National Capital Region Police Office (NCRPO) para sa seguridad ng ikalawang State of the Nation Address (SONA) ni Pangulong Rodrigo Duterte sa Lunes, 24 Hulyo.

Sinabi ni NCRPO Chief, Director Oscar Albayalde, ipapakalat niya ang kanyang mga tauhan partikular sa kahabaan ng Commonwealth Avenue mula sa Quezon City Circle hanggang sa Litex sa Batasan Road sa Sabado, upang matiyak na walang sagabal at mapigilan ang ano mang tangkang panggugulo ng New People’s Army (NPA) o ano mang grupo sa mismong araw ng SONA.

Bubuhos ang puwersa at ikakalat ang mga pulis sa Lunes at mahigpit na babantayan ang kilos ng mga magpoprotesta sa kahabaan ng Commonwealth Avenue hanggang Batasan Road.

Ayon sa NCRPO chief, ina-tasan niya ang lahat ng station commanders at PCP commanders na higpitan ang pagbabantay sa matataong lugar sa Metro Manila, gaya sa malls, LRT at MRT gayondin sa PNR, bus terminal at paliparan.

(JAJA GARCIA)