HATAW! D'yaryo ng Bayan hatawtabloid.com
TATLO katao ang sugatan makaraan magbarilan ang isang pulis at retiradong US Navy dahil sa away-trapiko sa Rodriguez, Rizal, kamakalawa ng gabi.
Sa record ng pulisya, ang mga sugatan ay sina PO2 Rodel dela Cruz, nakatalaga sa Northern Police District (NPD), Narson Francisco, dating US Navy, at bayaw niyang kasama sa kotse na si Robert de Pedro.
Ayon sa ulat, dakong 11:30 pm mangyari ang insidente sa Metro Manila Hills Subd., sa Brgy, San Jose, sa nabanggit na ba-yan.
Napag-alaman, nag-counterflow si Francisco na minamaneho ang To-yota Vios para iwasan ang humps ngunit eksaktong pasalubong ang Mitsubishi Mirage na minamaneho ni Dela Cruz, naging dahilan ng kanilang pagtatalo na humantong sa suntukan.
Makaraan magsuntukan, kapwa bumalik sa kanilang sasakyan ang dalawa at kinuha ang kanya-kanyang baril at nagbarilan sa gitna ng kalsada.
Tinamaan ng dalawang bala sa binti si Dela Cruz habang si Franciso ay tinamaan ng bala sa leeg at ang bayaw niyang si De Pedro ay sa likod at kili-kili.
Pinalad na hindi tinamaan ang buntis na misis ng pulis na noon ay nasa loob ng sasakyan.
Dinala sa magkakahiwalay na ospital ang tatlong sugatan habang iniimbestigahan ng pulisya ang insidente.
ni ED MORENO
