HATAW! D'yaryo ng Bayan hatawtabloid.com
PUNO ng korupsiyon ang anim-taon panunungkulan ni dating Pangulong Benigno Aquino III, at hindi na ito mabubura sa kasaysayan.
Ito ang buwelta ni Pangulong Rodrigo “Digong” Duterte sa mga taga-Liberal Party na suking kritiko ng idineklara niyang martial law sa Mindanao, bunsod nang pagkubkob ng mga terorista sa Marawi City.
Ang mga taga-LP aniya na walang bukambibig dati kundi ang paratangan na ‘corrupt’ ang administrasyong Arroyo, ang tadtad pala ng katiwalian ang gobyerno.
Anang Pangulo, madali lang magdaldal o magpapogi sa pagbatikos sa martial law sa Mindanao lalo na’t nakatira sila sa Luzon at hindi nararanasan ang lupit ng terorismo. “Maybe sila kasi sa Luzon okay lang sila e. But ilagay mo dito sa Mindanao? Make him establish a residence here in Marawi and in Zamboanga and Jolo, tingnan natin,” aniya.
“Madali lang kasi mag-daldal, magpapogi. It’s very easy to, you know, criticize. But history has shown na ‘yung nagki-criticize, ‘yung noon Liberal sinasabi ‘corrupt, corrupt’ si Arroyo ngayon sila, o tingnan mo ‘yung six years e ‘di puro corruption,” dagdag niya.
Matatandaan, isiniwalat ni Pangulong Duterte na lumala ang narco-politics sa bansa sa panahon ng rehimeng Aquino kaya nahihirapan siya ngayon na sugpuin ang terorismo dahil pino-pondohan ito ng drug mo-ney. Ipinangako ng Pangulo na walang matitirang shabu laboratory sa Mindanao kapag binawi niya ang batas militar sa rehiyon.
“I will promise you there will never be cooking of shabu in this island of Mindanao when I am through. I have ordered the military and the police to strike hard against the drug people kasi kasama na sila sa rebellion. Ang rebellion was financed by drug money,” aniya.
Ang pinakamalaking shabu laboratory sa Mindanao ay pagmamay-ari ng Maute terrorist group.
(ROSE NOVENARIO)
