HATAW! D'yaryo ng Bayan hatawtabloid.com
UMABOT sa 50 kilo ng hinihinalang shabu, P250 milyon ang halaga, ang nakompiska sa isang Taiwanese national makaraan arestohin sa isang hotel sa Brgy. Baclaran, Parañaque City nitong Sabado.
Ayon sa ulat, ang shabu ay natagpuang nasa tatlong styrofoam boxes at napapatungan ng mga tuyong isda.
Ang suspek na inaresto sa Red Planet Hotel Aseana ay kinilalang si Chen Teho Chang, 56, residente sa Biñan, Laguna.
Bukod sa hinihinalang droga, kinompiska rin ang pulang Honda Civic (VEM 268) at isang HTC cellular phone.
Ayon kay Philippine National Police’s Drug Enforcement Group (DEG) public information officer Supt. Enrico Rigor, ang suspek ay dalawang buwan isinailalim sa surveillance bago inaresto.
Ang suspek ay sasampahan ng kasong paglabag sa Section 5 ng RA 9165.
(JAJA GARCIA)
