Chinese IT engineer utas sa ambush

PATAY ang isang Chinese na Information Technology (IT) engineer, makaraan pagbabarilin ng isa sa grupo ng kalalakihan lulan ng kotse sa Makati City, kahapon ng madaling-araw.

Nalagutan ng hininga habang ginagamot sa Makati Medical Center si Andy Bai, 24, ng 11G One Central, Brgy. Bel-Air, sanhi ng tama ng bala sa tiyan, mula sa kalibre .45 baril.

Inaalam ng pulisya ang pagkakakilanlan ng mga suspek upang panagutin sa insidente.

Base sa ulat kay Makati City Police chief, Senior Supt. Dionisio Bartolome, dakong 3:10 am nang mangyari ang insidente sa  L.P. Leviste St., Salcedo Village, Brgy. Bel-Air, ng lungsod.

Sa pahayag sa mga awtoridad ng kaibigan na si Jason Tan, 25, kasama niyang naglalakad si Bai patungo sa car park, nang sumulpot ang mga suspek na sakay ng puting Sedan (NSO-950).

Isa sa mga suspek ang bumunot ng baril, pinaputukan ang biktima, at pagkaraan ay mabilis na tumakas.

Binubusisi ng mga pulis kung nahagip ng closed circuit television (CCTV) camera sa lugar, ang insidente upang matukoy ang mga suspek. (JAJA GARCIA)