Jeepney drivers haharapin ni Digong

HAHARAPIN  ni Pangulong Rodrigo Duterte ang mga tsuper at operator ng mga pampasaherong jeep, na naglunsad ng tigil-pasada nitong Lunes, bilang pagkondena sa planong modernisasyon sa mga pampublikong sasakyan.

Ayon kay Presidential Spokesman Ernesto Abella, nais mapakinggan ng Pangulo ang pagtutol ng mga jeepney driver sa panukalang modernisasyon sa mga pampublikong sasakyan o phaseout ng mga lumang modelo.

Sinabi ni Abella, nais ng Pangulo na marinig lahat ang  boses ng iba’t ibang sektor ng lipunan para personal na mabatid ang  kanilang mga hinaing lalo at may  kinalaman ito sa  kanilang  pang-araw-araw na  pamumuhay.

Gayonman, sinabi ni Abella, wala pang itinatakdang petsa ang pag-pupulong.

Nauna nang nakausap ng Pangulo ang ilang labor  groups at tinalakay ang mga posibleng solusyon para  matuldukan ang problema sa contractualization o mas  kilala bilang ENDO o end of contract.”

(ROSE NOVENARIO)