Fiscal sa kyusi utas sa ambush

PATAY noon din ang isang piskal ng Quezon City Prosecutor’s Office makaraang pagbabarilin ng hinihinalang hired killer sa harap ng isang bar sa Brgy. Old Balara, Quezon City kahapon ng madaling araw.

Sa ulat kay Chief  Supt. Guillermo Lorenzo T. Eleazar, Quezon City Police District (QCPD) director,  si Prosecutor Noel Mingoa ay namatay noon din dahil sa mga tama ng bala sa iba’t ibang bahagi ng kanyang katawan mula sa kalibre .45.

Sa imbestigasyon ng Criminal Investigation and Detection Unit (CIDU) dakong 1:30 am nang maganap ang insidente sa harap ng isang bar sa Commonwealth Avenue, Brgy. Old balara.

Napag-alaman, habang may kausap ang fiscal sa cellphone nang huminto ang isang itim na kotse. Bumaba mula rito ang isang lalaki at pinagbabaril ang biktima.

Pagkaraan, muling sumakay ang suspek sa kotse at mabilis na tumakas.

Ayon kay Eleazar, isasailalim sa pagsisiyat ang cellphone ng biktima para matukoy kung sino ang kausap ni Mingoa nang maganap ang krimen.

Sisiyasatin din kung may kinalaman sa trabaho ang pagpaslang sa fiscal lalo na ang mga kasong hawak niya bilang isang prosecutor.

(ALMAR DANGUILAN)