HATAW! D'yaryo ng Bayan hatawtabloid.com
SAMPUNG pasahero ng Metro Rail Transit (MRT) 3 ang nasaktan dahil sa pagkasira ng escalator sa Taft Avenue Station sa Pasay City kahapon ng umaga.
Ayon kay MRT-3 General Manager Deo Manalo, dakong 9:45 am nang biglang huminto ang andar ng isang escalator sa na-sabing estasyon.
Sinabi ni Manalo, pawang minor injuries lang ang naranasan ng mga biktimang hindi na binanggit ang pangalan, kabilang ang dalawang napilayan sa kamay, pawang pinauwi na makaraan lapatan ng lunas.
Sa post sa twitter account ng DoTC-MRT-3, sinabing tinulungan ng medical personnel ang mga pasaherong nasaktan sa insidente.
Giit ni Manalo, hindi sila nagkulang sa pangangasiwa ng MRT dahil nasa ilalim ng rehabilitasyon ang ilan sa mga elevator at escalator ng na-sabing mass transport na inaasahang matatapos sa Enero o Pebrero, 2017.
Masusing inaalam ng pamunuan ng MRT-3 ang sanhi ng pagpalya ng escalator.
(JAJA GARCIA)
