5 drug suspects itinumba

LIMANG lalaking hinihinalang sangkot sa droga ang namatay makaraan pagbabarilin ng hindi nakilalang mga suspek habang nasugatan ang isang negosyante sa magkakahiwalay na insidente sa southern Metro Manila.

Si Danilo Bolante, 48, ay agad binawian ng buhay makaraan pagbabarilin kamakalawa ng gabi ng dalawang lalaking maskarado sa kanilang bahay sa Block 1, Electrical Road, Brgy. 191, Zone 20, Pasay City.

Dakong 2:45 pm kamakalawa nang pagbabarilin ng hindi nakilalang mga suspek sina Nante Kamandag, 35, at Reynante Lucas sa harapan ng Tresor Commercial Building sa 2222 Taft Avenue St., Pasay City.

Dakong 12:00 am nang mamatay si Jonathan Gamboa nang pagbabarilin ng limang lalaking lulan ng dalawang motorsiklo malapit sa kanyang bahay sa Bonifacio St., Brgy. Rizal, Makati City.

Pasado 1:00 am, pinagbabaril ng hindi kilalang mga suspek na nakamotorsiklo ang biktimang si Angelo Garcia, 25, malapit sa kanyang sa bahay sa Airport Road, Brgy. Baclaran, Parañaque City.

Samantala, sugatan si Rommel Cuambot, 54, makaraan pagbabarilin sa Block 17, Excess Lot, Soldiers Hills, Brgy. Putatan, Muntinlupa City ng mga suspek na sina Loloy Ybale at Ruben Mendigo, kapwa nakatira sa nabaggit na lugar.

Habang nasa emergency room ang biktima, sinabi niya sa mga pulis na sina Ybale at Mendigo ang bumaril sa kanya.

(JAJA GARCIA)