Motorcycle lane policy ubra kaya?

Muli na namang ipinatutupad ang Motorcycle Lane Policy ng MMDA.

Mahigit sa 200 riders ang nahuli sa unang araw ng arangkada nitong Lunes. Bumabagtas ang nahuling riders sa EDSA, C-5 Road, Commonwealth Ave., at Macapagal Avenue.

Katuwang ng MMDA ang mga miyembro ng Motorcycle Federation of the Philippines (MCFP) sa unang araw ng operasyon laban sa mga pasaway na motorista. Layunin ng ipinatutupad na Motorcycle Lane Policy na gumaan ang daloy ng mga sasakyan at para rin sa kaligtasan ng riders.

Sa datos ng MMDA, ang pinakamataas na bilang ng aksidente ay kinasasangkutan ng mga motorsiklo, na kadalasan nauuwi sa kamatayan.

Ayon kay MMDA Chairman Tim Orbos, maghihigpit sila sa pagpapatupad ng Motorcycle Lane Policy at iba pang polisiyang pinatutupad ng ahensiya na may kaugnayan sa pagmamantina ng trapiko sa Metro Manila.

Sa itinakdang Motorcycle Lane Policy, bawal ang swerving sa mga motorsiklong napakahilig sumingit-singit. Huhulihin sila ng mga enforcer. Ayon kay Orbos, kailangang kompleto ang safety gear ng mga rider

kapag babagtas sila sa mga major thoroughfare. Bawal ang mga rider na naka-shorts at naka-tsinelas.

***

Ngunit may katanungan na dapat sagutin dahil sa bahagi ng Commonwealth kadalasan ang aksidente ay dahil tumatawid ang riders sa kalye. Dapat siguro sa magkabilang lane kaliwa at kanan ay lagyan ng motorcycle lane. Kung nasa bahaging kanan ang linya, paano kung sa kaliwa ang pupuntahan ng riders, hindi ba puwedeng tumawid?

***

Suhestiyon naman ng iba nating readers ay mas dapat na higpitan ang pagkakaroon ng safety gears ng riders, at mahigpit na ipagbawal ang kawalan ng helmet ng at ng angkas. Bigyan din ng sentro ang pagkakaroon ng dalawang angkas na kadalasan ay anak na maliit ang sakay-sakay na nakaupo sa gitna. Maganda ang layunin ng Motorcycle Policy Lane, ngunit dapat siguro ay pag-aralan mabuti ang pagpapatupad nito. Baka imbes mabawasan ang aksidente ay mas dumami pa!

***

Dapat ay hindi lamang sa mga pangunahing kalsada pairalin ang pagkakaroon ng safety gears, maging mga tricycle ay ipagbawal sa mga pangunahing kalsada. Halimbawa sa Roxas Blvd., sa hatinggabi maraming mga kuliglig mula sa Divisoria na nagrarasyon ng gulay ang bumabagtas sa kahabaan nito.

Napuna ito ng isang balikbayan na kaibigan ko, isa lang ang aking sagot: ONLY IN THE PHILIPPINES!

Isumbong mo kay Dragon Lady – Amor Virata