P8-T inilaan sa infra projects

AABOT sa mahigit walong trilyong piso ang ilalaan ng administrasyong Duterte sa infrastructure projects sa susunod na limang taon.

Inilatag kahapon sa press briefing ang nakalinyang infrastructure projects ng administrasyong Duterte para mapabilis ang government spending at ang paglago ng ekonomiya ng bansa.

Tinukoy nina Transportation Secretary Arthur Tugade, Public Works Secretary Mark Villar, Socio Economic Planning Secretary Ernesto Pernia at Bases Conversion and Development Authority (BCDA) Chairman Vince Dizon ang malalaking infrastructure projects na gustong ipatupad sa loob ng anim taon ng administrasyong Duterte.

Sinabi ng mga kalihim, ang mga proyektong ipatutupad ng administrasyon ay solusyon sa kakulangan ng trabaho, pagpapababa ng presyo ng mga pangunahing bilihin, at mas mabilis na transportasyon.

Ayon kay Secretary Villar, target ng gobyerno na itaas sa 5-7% ng Gross Domestic Product ang infrastructure spending ng gobyerno mula sa average na 2.2% sa mga nakalipas na administrasyon.

Kabibilangan aniya ng railways, urban mass transport, airports, seaports, mga tulay at kalsada, at mas magagandang mga lungsod o green cities.

Habang ang “battlecry” na susundin ng gobyerno ay “build, build, build” ibig sabihin ay hindi hihinto ang pagtatayo ng  infrastructure projects 24 by 7.

Ilan sa malalaking proyekto ang tulay na magdudugtong sa Iloilo, Guimaras, Negros, at Cebu; Manila Clark railway project, Mindanao Railway, Regional Airport Development, Ro-ro port development at ang Clark green city.

Tiniyak ng mga kalihim ang transparency ng mga proyekto ng pamahalaan dahil gusto anila ni Pangulong Duterte ang malinis na gobyerno.

Sinabi nilang ipatutupad nila ang “freedom of information portal” at dito ilalabas ng gobyerno ang lahat ng transaksiyon ng gobyerno mula sa mga kasunduan hanggang sa pondong ginastos sa mga proyekto.

Samantala, umapela sa publiko si Secretary Pernia na dapat ay tiisin muna ng publiko ang kaunting abala habang itinatayo ang mga proyekto ng gobyerno.

( ROSE NOVENARIO )