HATAW! D'yaryo ng Bayan hatawtabloid.com
NAGLABAS ng isang linggong self imposed deadline ang Bocaue, Bulacan Police para tapusin ang imbestigasyon sa nangyaring pagsabog ng ilang tindahan ng paputok sa kanilang bayan, na ikinamatay ng dalawa katao at ikinasugat ng mahigit 20 iba pa, habang P20 milyon ang halaga ng mga pinsala sa mga ari-arian.
Ayon kay Bocaue Mayor Joni Villanueva-Tugna, magkatuwang sa imbestigasyon ang Philippine National Police at Bureau of Fire Protection para mabilis na matapos ang pagsisiyasat.
Sa mga naunang imbestigasyon, napag-alamang nagsimula ang sunog sa tindahang pag-aari ni Gina Gonzales, isa sa dalawang namatay, kasama ang ex-Brgy. Captain na si Gigi Ayala.
Ayon sa tindera ni Gonzales, hindi na pinangalanan, nagsimula ang sunog mula sa mga nakaimbak na ‘devil’ isang uri ng kemikal na gamit sa paggawa ng paputok.
Sinabi ng tindera, tinangka nilang patayin ng among namatay ang apoy sa pamamagitan nang pagbuhos ng tubig at fire extinguisher ngunit hindi nakayanan hanggang kumalat ang sunog.
Aniya, dahil sa paglaki ng apoy ay lumabas sila ni Gonzales ngunit bumalik ang amo sa loob ng tindahan upang kunin ang naiwang bag hanggang abutan nang malakas na pagsambulat na siya niyang ikinamatay hanggang sunod-sunod na ang pagsabog.
( MICKA BAUTISTA )
PABRIKA IPINASARA
INIUTOS ng local government unit ng Bocaue, Bulacan ang pansamantalang pagpapasara ng mga pagawaan at bentahan ng mga paputok sa lugar.
Ito ay kasunod nang naganap na pagsabog sa isang tindahan ng paputok na ikinamatay ng dalawa katao at ikinasugat nang mahigit 20 biktima.
Sinabi ni Bocaue Mayor Joni Villanueva-Tugna, ang nasabing hakbang ay para maisagawa muna ang inspeksiyon sa mga lugar kung mayroong sapat na permit at safety certificate ang mga pagawaan at bentahan ng mga paputok.
