Bebot patay, 1 sugatan sa jeep na nawalan ng preno

PATAY ang 37-anyos babae habang sugatan ang isa pa makaraan mabundol ng pampasaherong jeep na mawalan ng preno sa San Miguel, Maynila.

Kinilala ng Manila District Traffic Enforcement Unit, ang biktimang namatay na si Rasheda Olama, 37, residente ng 148, Brgy. 648, Carlos Palanca St., San Miguel, habang sugatan si Namira Dasilo, 41, residente ng 261 Padre Casal Street, San Miguel, Maynila.

Agad nadakip ang suspek na si Leo Orfilla, 41, residente ng 708 T. Anzures Street, Sampaloc, Maynila, driver ng pampasaherong jeep (TGA-185) na may rutang San Miguel-Ikot via Padre Casal.

Ayon sa ulat, dakong 5:05 pm nang maganap ang insidente sa Padre Casal St., kanto ng Carlos Palanca Street sa San Miguel nitong Huwebes.

Nabatid na minamaneho ni Orfilla ang jeepney patungong northwest direction ng Padre Casal, sa kanto ng Carlos Palanca nang biglang mawalan ng preno at nasapol ang mga biktima.

( LEONARD BASILIO )