HATAW! D'yaryo ng Bayan hatawtabloid.com
BILANG paglingon sa kanilang pagkakaibigan ay present ang dating singer na si Adrian Panganiban (isa na siyang pastor ngayon) sa burol ni Buboy Villamayor, bunsong kapatid ni Nora Aunor.
Naroon si Alde (palayaw ni Adrian) para damayan nga naman ang pamilyang naulila ni Buboy kasabay ng pag-alala na minsan isang panahon ay naging malapit sila sa isa’t isa. Dekada sitenta ‘yon.
Ayon sa balitang nakarating sa amin, iniabot daw ng grupo ni Adrian ang kanilang nakasobreng tulong kay Ate Guy, pero gaano katotoong hindi raw sila pinansin nito’t hindi tinanggap ang abuloy? Bagkus ay inismiran pa raw sila ng Superstar?
Pero nauunawaan naman daw ni Adrian ang damdamin ni Ate Guy sa pagkawala ng paboritong kapatid. Baka raw hindi pa nito ganap na natatanggap na yumao na ito. Buboy is survived by his two other siblingsTita and Nora (tatlo na kasi sa magkakapatid ang namaalam).
Samantala, sa mga larawang kuha sa libing ni Buboy ay makikitang nakatalungko si Ate Guy habang pinagmamasdan ang mga huling sandali ng kapatid.
Maging ang mga litratong ‘yon ay hindi pinalampas ng mga basher na kesyo kaya ganoon na lang daw ang lungkot sa mukha ni Nora ay dahil aware siyang kinukunan ng camera. Maaari rin daw na nilukuban siya ng guilt feelings dahil sa kanyang mga pagkukulang sa nasirang kapatid.
HOT, AW! – Ronnie Carrasco III
