Cybersex hub sa Bulacan sinalakay, 20 arestado

SINALAKAY ng mga tauhan ng Philippine National Police Anti-Cybercrime Group (PNP-ACG) ang isang hinihinalang cybersex hub sa Brgy. San Martin, Sapang Palay, Bulacan kamakalawa.

Arestado sa mga tauhan ng PNP-ACG ang 20 telemarketers o chat operators ng Jaila Online Marketing Services na mala-call center ang set up.

Kompiskado ang higit 30 computers, hard drives, operating system, servers, at iba pang gamit sa cybercrime.

Ayon sa PNP Anti-Cybercrime Group, front lamang ng kompanya ang sinasabing pagbebenta ng membership sa website.

Paglalahad ni Sr. Supt. Lorenzo Eleazar, sa simula ay aakitin ang mga biktima na magpamiyembro sa site sa halagang P500.

Pagkatapos nito ay nakukumbinsi ng mga lalaking nagpapanggap na mga babae, ang mga kausap upang magpadala ng mga compromising video o hubad na larawan.

Ito ang kanilang gagamitin upang pang-black mail at hihingian nila ng pera ang mga biktima.

Kabilang sa mga nakompiska ang 30 computer, hard drive, operating system servers at iba pang gamit sa cyber crime.

Kaya rin aniya ng grupo na ubusin ang pera ng biktima pagpasok sa website gamit ang credit card.

Mariin itong itinanggi ng supervisor ng Jaila Online.

Dahil mas malawak na abot ng internet, karamihan sa mga biktima ay mga lalaki sa buong mundo.

Sa katunayan, isa na ang Filipinas sa tatlong bansang tinututukan ngayon ng Interpol dahil sa talamak na sextortion activities.

Ang dalawang iba pa ay Morocco at Ivory Coast.

Nakikipagtulungan na rin ang PNP-ACG sa Interpol at Anti Cybercrime Groups ng iba pang bansa para solusyonan ang problema.