2 patay sa ratrat sa lamayan

PATAY ang dalawang lalaki makaraan pagbabarilin habang nakikipaglamay sa patay sa Brgy. Payatas, Quezon City nitong Huwebes ng madaling-araw.

Ayon sa mga saksi, nagbabaraha at nag-iinoman ang mga biktima habang nakikipaglamay sa loob ng covered court sa Visayas Street nang lapitan sila ng suspek.

Pagkaraan ay pinagbabaril ang mga biktimang sina Ricky Elcarte at Xavier Pinlac.

Nakatakbo pa si Elcarte patungo sa eskinita palabas ng covered court ngunit sinundan siya ng suspek at muling pinaputukan, dahilan nang agaran niyang pagkamatay.

Naisugod pa sa ospital si Pinlac ngunit idineklarang dead-on-arrival.

Naniniwala ang mga nakakita, nadamay lang si Pinlac sa pangyayari at si Elcarte talaga ang tunay na target.

Pasimple lang anilang naglakad pabalik sa naghihintay na motorsiklo ang suspek, umangkas at umalis.

Tumangging magbigay ng pahayag ang ilang nakakita sa insidente dahil sa takot na balikan ng salarin.