Zero tolerance vs korupsiyon, kriminalidad

BINIGYANG-DIIN ni incoming President Rodrigo Duterte, magpapatupad siya ng ‘zero-tolerance’ laban sa korupsiyon at kriminalidad sa bansa.

Sinabi ni Duterte, ito ang magiging ‘standard’ ng kanyang pamumuno at nakatakdang suwayin ang Commission on Human Rights (CHR) dahil marami ang mamamatay na kriminal.

Ayon kay Duterte, hindi raw niya papayagang sisirain ng mga tiwali at kriminal ang bansa lalo ang mga kabataan.

Kaugnay nito, nagbabala si Duterte na iiral ang ‘narco-politics’ sa buong bansa makalipas ang pitong taon kung mabibigo ang PNP sa kampanya laban sa illegal drugs.

Sa ngayon pa lamang aniya, nasa 32 alkalde na ang nanalo sa eleksiyon na pinondohan ng drug lords at nakaupo na ngayon sa puwesto.

Kaya hindi raw niya ito uupuan lamang at tiniyak ang gagawing aksiyon laban sa hindi tinukoy na mga mayor.

Samantala, nakatakdang magpatupad si Duterte nang malawakang revamp sa PNP para tiyaking makatotohanan ang kampanya laban sa illegal drugs.

Inihayag ni Duterte, bagama’t marami ang napapatay na drug pusher sa ngayon makaraan ang kanyang pag-iingay, posibleng mga bata rin ng mga pulis ang kanilang pinagpapatay para hindi sila maikanta.

Mangangailangan din daw si Duterte ng isang company o nasa 50 pulis na bibigyan ng special assignment para tugisin ang mga sangkot sa illegal drugs.