Sarili inilunod ng kelot sa Iloilo River

ILOILO CITY – Patay na nang matagpuan ng mga tauhan ng Philippine Coast Guard ang isang lalaking tumalon sa Iloilo River pagkalipas ng ilang oras na search and rescue operation kamakalawa.

Ayon kay Lt. Commander Ramil Palabrica ng Coast Guard Station Iloilo, nakapagsabi pa ang lalaki sa on duty-guard na hihintayin niya ang biyahe ng Weesam Express upang makauwi sa kanila sa Cagayan de Oro.

Nagulat na lamang ang mga nakakita nang biglang tumalon ang lalaki sa Iloilo River malapit sa Fast Craft Terminal.

Tinapunan siya ng life ring ng mga crew nang malapit na fast craft ngunit sadyang lumayo ang biktima hanggang umabot sa malalim na bahagi ng ilog at tuluyan nang pumailalim.

Agad nag-deploy ng rescue team ang Coast Guard ngunit hindi nila nakita ang biktima.

Lumipas pa ang halos tatlong oras bago nakita ang katawan ng biktima.

Ang hindi pa nakikilalang lalaki ay nakasuot ng asul na t-shirt at shorts, tinatayang nasa 25-30 anyos, at may taas na 5’3″ hanggang 5’4″.