Marcos ilibing sa Ilocos Norte — Joma

DAVAO CITY – Hinimok ni Communist Party of the Philippines (CPP) founder Jose Maria Sison ang pamilya Marcos na tuparin ang naunang pangako na ilibing na lamang ang labi ni dating Pangulong Ferdinand Marcos sa Ilocos Norte.

Sinabi ni Sison, hindi dapat igiit ng Marcoses ang paglilibing sa labi ng diktador sa Libingan ng mga Bayani.

Aniya, dapat igalang ng pamilya ang unang kasunduan kay dating Pangulong Fidel V. Ramos, na pumayag na maibalik sa bansa ang labi ni Marcos mula sa Hawaii, sa kondisyong ililibing ito sa kanilang home province.

“Ang mga Marcos dapat tuparin nila ang pangako nila na ang labi ni Marcos ay ililibing nila sa Ilocos Norte. Sa palagay ko nakalibing na iyon, wax na lang ang nakalitaw,” pahayag ni Sison sa video call session sa Davao City.

Gayonman, sinabi ni Sison, hindi siya ganap na tumututol na malibing si Marcos sa Libingan ng mga Bayani, dahil hindi niya ikinokonsiderang ang sementeryo ay para sa mga bayani.

“At their own risk, puwede na nilang ilagay sa libingan ng maraming traydor. Hindi naman mga bayani ang lahat ng nandoon e,” aniya.