2 patay sa CIDG drug ops (P15-M shabu kompiskado)

HUMANTONG sa shootout ang buy-bust operation ng mga tauhan ng Philippine National Police – Criminal Investigation and Detection Group (PNP-CIDG) sa Brgy. Pinyahan, lungsod ng Quezon kahapon ng umaga.

Ayon sa pulisya, natunugan ng mga dealer ng droga ang kanilang mga tauhan kaya nauwi ito sa palitan ng putok.

Patay ang dalawang drug suspect, habang na-recover sa crime scene ang tatlong kilo ng shabu, dalawang kalibre .45 baril, kotse at ilang paraphernalia.

Sa pagtaya ng mga awtoridad, may street value ang shabu na aabot sa P15 milyon.

Kinilala ni Senior Supt. Ronald Lee ng CIDG-NCR ang dalawang napatay na mga suspek na sina Khalid Amintao at Ala Asnawe, base sa mga ID na nakuha sa kanilang mga gamit.

Sinasabing noong Mayo pa sinimulan ang surveillance at kahapon inilunsad ang police operation.

Isinugod sa ospital ang mga suspek ngunit binawian ng buhay sa sasakyan pa lamang.