Biker nahulog, tigok

HINDI na umabot nang buhay sa Ospital ng Maynila makaraan bumagsak mula sa sinasakyang bisikleta nang atakehin sa puso ang isa sa daan-daang bikers na lumahok sa “Fil-Chinese Friendship Day” biking event sa Roxas Boulevard sa Maynila kahapon ng umaga.

Ayon sa imbestigasyon ni SPO2 Jonathan Bautista, ng Manila Police District-Homicide Section, kinilala ang biktimang si Virgilio Pagulayan, nasa hustong edad, at residente ng Malibay, Pasay City.

Kasama ng biktima ang ilan niyang kaibigang bikers nang biglang nalaglag sa kanyang bisikleta sa harap ng Aristocrat Restaurant sa Roxas Boulevard dakong 11 a.m.

Mabilis na isinugod ang biktima ng kanyang mga kasama sa pagamutan ngunit hindi na umabot nang buhay.