HATAW! D'yaryo ng Bayan hatawtabloid.com
FOLLOW-UP ito sa nasulat namin dito sa Hataw kamakailan na naka-tsikahan namin si Direk Quark Henares sa nakaraang My Candidate presscon tungkol sa balitang may anak ang mama Vicki Belo niya at si Hayden Kho sa pamamagitan ng surrogate mother.
Base sa panayam namin kay direk Quark, nabanggit niyang eight years ago pa raw napag-uusapan na gustong magkaroon ng ‘kid’ ang mama niya kaya hindi naman kataka-takang tinototoo na nila ito ng boyfriend niyang si doc Hayden na sampung taon na ang relasyon nila.
Nadulas pa nga si direk Quark na may “baby sister” na raw sila at saka tumawa ng malakas at hintayin na lang daw na ang mom Vicki at si Hayden ang opisyal na magsabi tungkol dito.
Ilang araw ang nakalipas at mukhang kinompirma na nga ni doc Hayden ang pinag-usapan namin ni direk Quark dahil nag-post siya sa kanyang Instagram noong linggo kasama ang anak nilang si Scarlett Snow.
“I guess God knew fatherhood would change me completely and bring me closer to being the kind of man He always wanted me to be, so He sent me and Vicki an angel who is to be our lifelong inspiration. Ladies and gentlemen, meet our daughter, Scarlet Snow.@scarletsnowbelo,” post ni doc Hayden.
Samantala, hindi naman binanggit ni Hayden kung paano nabuo o saan galing si Scarlett Snow para siguro wala ng maraming tanong-tanong pa, pero maraming nakahula na ito na nga ‘yung matagal ng plano na may kinausap silang tao para ipagbuntis ang bagets or surrogate mother.
Walang nabanggit kung ilang buwan na si Scarlett Snow kaya hulaan mo na lang Ateng Maricris base sa billboard nitong naka-display sa may Morato, Quezon City bilang endorser ng baby products ng Belo Medical Group.
FACT SHEET – Reggee Bonoan
