Ex-vice mayor sa Bulacan utas sa ambush

HINDI na umabot nang buhay sa pinagdalhang pagamutan ang dating vice mayor ng bayan ng Pandi, Bulacan na si Roberto Ruben Rivera makaraang pagbabarilin ng hindi nakilalang lalaki sa Brgy. Manatal sa nabanggit na bayan nitong Lunes ng gabi.

Lumitaw sa imbestigasyon ng pulisya, lulan ng kanyang pick-up truck si Rivera at pauwi na sa kanilang bahay nang lumapit sa kanya ang suspek.

Pagkaraan ay mabilis na binuksan ng suspek ang pinto ng sasakyan saka limang beses na pinagbabaril ang biktima.

Ayon sa driver ng biktima, hindi niya gaanong namukhaan ang suspek dahil nakasuot ng sombrero at eye glasses.

Makaraan ang pamamaril, naglakad lamang palayo ang suspek at sumakay sa isang tricycle.

Tinitingnan ng pulisya kung may kaugnayan sa politika ang pagpaslang sa dating local official na dalawang terminong nanungkulan bilang bise alkalde noong 1992 at 1995.

Sinisilip din sa imbestigasyon ang posibilidad na may kinalaman sa negosyo ang krimen.

Habang sinabi ng pamilya na wala silang alam na sino mang nakaaway ng biktima.

( DAISY MEDINA / MICKA BAUTISTA )