2 pinugutan, 4 pinalaya ng Maute group

DALAWA sa anim katao na dinukot ng Maute group sa Lanao del Sur ang pinugutan makaraan paghinalaan bilang mga ahente ng militar. Habang ang apat ay pinakawalan, ayon sa mga awtoridad.

Ang mga biktima ay dinukot dakong hapon noong Abril 4 mula sa worksite sa Butig.

Ayon sa isa sa mga biktima, sila ay nakagapos at nakapiring sa loob ng pitong araw. Isa-isa anila silang inimbestigahan upang mabatid kung sila ay mga ahente ng militar.

Sinabi ni Julito Janobas, sa kabila nang paggiit na sila ay inosente, naniniwala ang grupo na mayroong intelligence agent sa kanila.

Ang apat ay pinalaya ngunit ang kasama nilang sina Salvador at Jeymart Permites ay naiwan at pinugutan bunsod nang sinasabing pagiging impormante ng militar.