2 patay, 1 sugatan sa kapwa parak (Sa loob ng police station)

VIGAN CITY – Dalawa ang patay at isa ang sugatan makaraan silang barilin ng kapwa pulis habang kumakain sa loob mismo ng police station sa Poblacion Sigay, Ilocos Sur kamakalawa.

Kinilala ang mga namatay na sina SPO2 Leborio Dangalen at NUP member Mark Jay Barrientes, habang sugatan si SPO2 Gilbertt Rabang.

Natukoy ang suspek na si PO1 Roel Parragas, miyembro ng PNP-Sigay.

Sa imbestigasyon, kumakain sina SPO2 Gilbertt Rabang, Mark Jay Barrientes, PO1 Leo Aoay at SPO2 Leborio Dangalen nang pumasok ang suspek at walang habas na pinagbabaril ang kanyang mga kasama.

Suwerteng hindi tinamaan si PO1 Leo Aoay dahil nagtago sa ilalim ng mesa.

Limang minuto rin nagtagal ang pamamaril at natigil lamang nang agawin ni Rabang ang baril ng suspek na 9mm Glock-17.

Naitakbo pa ang mga sugatan sa ospital ngunit idineklarang dead on arrival sina Dangalen at Barrientos.