TV executive, bilyones na ang winawaldas sa isang estasyon

HILONG TALILONG ngayon ang isang TV executive dahil malapit nang mamaalam ang umeereng programa na produced niya.

Nakailang pitch na raw ang TV executive sa big boss ng TV network pero hindi raw ito pumapasa dahil bukod sa hindi naman kagandahan ang project ay sobrang laki raw ng budget na imposibleng mabawi.

Marami na raw kasing ipinagkatiwalang project ang big boss sa TV executive, pero lahat ay nalugi at umabot pa sa bilyones ang nawala sa kaban ng network na ang running joke ay, “’yung nalugi ni (TV executive) ay kapareho naman ng kinita ni Henry Sy sa negosyo niya sa buong taon.”

Nakagugulat nga kung totoo ito dahil anong nangyari, bakit nga ba umabot sa bilyones ang nawala sa kaban ng big boss ng network?

Dagdag kuwento pa ng aming source, “eh, paano, kahit hindi naman dapat mag-out of the country shoot, doon gagawin at buti sana kung ilan lang ang tao, eh, ang dami-daming kasama, ano ‘yun tour? Ang laki na ng budget sa show, ang mamahal pa ng talent fees nila at kung ano-anong add-ons pa.”

Anyway, nabalitaan din ng big boss ng network na nag-pitch din daw ang TV executive sa kalabang network na tumatanggap ng block timer na ipalalabas naman sa cable channel nila at hinihintay lang kung approve o hindi.

Parang kailan lang Ateng Maricris, parang nasa tuktok ng Mt. Everest ang tayog ng TV executive na naikot na yata ang lahat ng TV station pero hindi siya nagtatagal at nalaman namin na may mga naging isyu pala kaya hindi na makabalik.

FACT SHEET – Reggee Bonoan