Pag-iyak ni Arjo noong Lunes sa Ang Probisyano, effortless

PINATAY na ang karakter ni Bela Padilla bilang Carmen sa FPJ’s Ang Probinsiyano  at iisa ang tanong ng viewers, ‘bakit pinatay si Carmen?  May bago na ba siyang show?’

Oo nga, bakit nga ba, eh, ‘di ba isa siya sa major cast?

Ang paliwanag sa amin ng Dreamscape staff, ”Hi Ms Reggee, ‘yun po kasi ang story talaga. Bela’s character ‘Carmen’ has already been extended. Salamat po.”

Sayang naman dahil hindi man lang nalaman ni Carmen kung paano at bakit namatay ang asawa niyang si Ador na kakambal ni Cardo bilang si Coco Martin.

Si Tomas (Albert Martinez) ang bumaril kay Carmen dahil nabuking na niya kung anong klaseng negosyong mayroon ang pamilya ni Joaquin (Arjo Atayde) bagay na hindi puwedeng palampasin ng tatay ng asawa niya.

At dahil dito ay nakiusap si Joaquin sa tatay niya na huwag patayin ang asawa dahil mahal na mahal niya at kahit anong utos ng ama ay susundin niya huwag lang mawala sa kanya si Carmen, pero huli na ang lahat dahil nangyari na.

Tulad ng viewers ay nadala rin kami sa eksenang umiiyak na nagsusumamo si Arjo kay Albert para sa buhay ni Bela.

Ang mga narinig naming komento, ”Ang galing umiyak ni Arjo, grabe ramdam mo ‘yung pag-iyak niya at effortless.”

FACT SHEET – Reggee Bonoan