CAFGU utas sa saksak ni misis sa Quezon

NAGA CITY – Patay ang isang miyembro ng Citizen Armed Forces Geographical Unit (CAFGU) makaraan pagsasaksakin ng kanyang sariling asawa sa Unisan, Quezon kamakalawa.

Napag-alaman, nadatnan ng suspek na si Josephine De Oro, 39, ang kanyang asawa na si Isagani De Oro, 51, at isa pang miyembro ng CAFGU sa kanilang bahay habang nasa impluwensiya ng alak.

Pinaghihinalaan ng biktima na may kalaguyo si Josephine kaya pinagsasampal at pinagmumura niya ang ginang.

Hindi pa nakuntento si Isagani, kumuha siya patalim at sinaksak ang suspek.

Nagawang maagaw ni Josephine ang patalim at inundayan ng saksak sa dibdib ang kanyang asawa.

Agad humingi ng tulong ang suspek makaraan ang pananaksak.

Isinugod sa ospital ang biktima ngunit idineklarang dead on arrival ng mga doktor.

Sa ngayon, nasa kostudiya na ng mga awtoridad ang nasugatan ding suspek habang inihahanda na ang kasong isasampa sa kanya.