HATAW! D'yaryo ng Bayan hatawtabloid.com
BUMALIK ng Singapore si Angel Locsin noong Linggo para sa follow-up therapy niya sa likod.
Nasulat namin dito sa Hataw na dumaan sa laser operation si Angel noong Pebrero na inabot ng apat na oras at dapat sana ay hanggang katapusan siya mananatili sa hospital pero limang araw lang doon ang aktres at umuwi rin dahil kaarawan ng daddy niya noong Pebrero 16.
Hindi pala natuloy umalis si Angel pagkatapos ng kaarawan ng tatay niya dahil marami siyang inasikaso bukod pa sa hindi rin natuloy ang international screening ng Everything About Her sa Singapore kaya noong Linggo lang ulit siya lumipad at mananatili raw hanggang katapusan ng Marso.
Live episodes na ang Pilipinas Got Talent Season 5 sa Abril kaya kailangang gumaling na si Angel dahil may mga project daw na nakapila, ayon sa taong kausap namin tungkol sa aktres.
Tinanong namin kung kasama ang Darna movie sa projects na nakapila pero hindi na kami sinagot ng kausap namin.
At sa nakaraang PGT5 episode noong Linggo ay maraming supporters nina Angel at Luis Manzano ang natuwa dahil ang sweet daw ng TV host/actor dahil inaalalayan ang dalaga nang makaramdam ng pananakit sa batok.
Tinanong tuloy kami ng ilang fans kung nagkabalikan na ang dalawa kaya binalikan din namin ang kausap namin kung ano na ang latest kina ‘Gel at Luis.
“They’re just being civil to each other siguro,” mabilis na sagot sa amin.
FACT SHEET – Reggee Bonoan
