Julia at Miles, nagkapatawaran na

MANANAIG ang katotohanan at pagpapatawad dahil nagkaayos na ang dating magkaribal na sina Joanna (Miles Ocampo) at Trixie (Julia Barretto) para maisalba ang kanilang mga buhay mula kay Dexter (Jay Manalo) sa huling linggo ng And I Love You So.

Matapos makuha ang mga ari-arian ni Alfonso (Tonton Gutierrez), tatakas si Katrina (Angel Aquino) kasama ang kanyang anak na si Trixie at lalayo kay Dexter upang masolo ang perang kanyang nakamkam. Ngunit bago pa sila makaalis, madarakip ni Dexter si Trixie at susubukang patayin ang dalaga. Pero makagagawa siya ng paraan na makatakas at hihingi ng tulong kay Joanna. Dahil sa lubos na pag-aalala, agad siyang pupuntahan ni Joanna at susubukang iligtas ang kanyang buhay.

Maisalba kaya ni Joanna mula sa panganib si Trixie o parehong malalagay sa bingit ng kamatayan ang kanilang mga buhay? Ano ang gagawin ni Katrina upang hindi magtagumpay ang masasamang plano ni Dexter?

Samantala, abangan sina Julia, Miles, Iñigo Pascual, at Kenzo Gutierrez na makipiyesta at magpadama ng taos-pusong pasasalamat para sa mainit na suporta ng mga manonood sa And I Love You So sa Kapamilya Karavan sa Araw ng Davao 2016 sa Sabado (March 12), 4:00 p.m. sa SM City Davao.

Tutukan ang huling linggo ng And I Love You So, tuwing hapon sa ABS-CBN. Para sa karagdagang impormasyon kaugnay sa programa, bisitahin lamang ang official social networking site ng Dreamscape Entertainment Television sa Facebook.com/DreamscapePH, Twitter.com/DreamscapePH, at Instagram.com/DreamscapePH.

( Reggee Bonoan )