Iñigo, may talent din sa pagsayaw

ANG saya-saya ni Inigo Pascual dahil first time niyang mag-front act sa katatapos na concert ni Nate Ruess Live In Manila sa KIA Theater noong Enero 19, Martes at talagang sing and dance ang bagitong aktor kasama ang G Force Dancers.

Base sa napanood naming kuha ay ang galing palang sumayaw ni Inigo at maganda ang boses, sorry to say Piolo Pascual, mas magaling ang anak mo sa ‘yo in terms of dancing at timbre ng boses.

Pagkatapos ng production number ni Inigo sa Nate Ruess concert ay balik siya sa taping ng And I Love You So kasama si Julia Barretto.

Base sa umeereng kuwento ng And I Love You So ay punompuno ng kalungkutan at pagluluksa ang pamilya Valdez sa pagpanaw ni Alfonso (Tonton Gutierrez) sa haponserye.

Matapos nga ang pagkabaril sa kanya ni Dexter (Jay Manalo) ay isinugod si Alfonso sa ospital upang subukang isalba ang kanyang buhay. Ngunit sa kasamaang palad, hindi na rin nito nakayanan ang pinsalang kanyang natamo.

Dahil dito, matinding pagluluksa ang hinarap ng kanyang mga mahal sa buhay, lalo na ng asawa nitong si Michelle (Dimples Romana) at mga anak na sina Trixie (Julia) at Joanna (Miles Ocampo).

Ngayon ngang pumanaw na si Alfonso, gagamitin ni Katrina (Angel Aquino) ang pagkakataon para bawiin ang yaman ng kanyang dating asawa at panatilihing sikreto ang katotohanan tungkol sa katauhan ni Trixie.

Ang pagkamatay ba ni Alfonso ang magiging hudyat sa tuluyang pagkakawatak ng pamilyang kanyang binuo? Ano pa kaya ang gagawin ni Katrina upang paghigantihan si Michelle?

Tutukan ang mga kapana-panabik na eksena sa And I Love You So, tuwing hapon sa ABS-CBN.

FACT SHEET – Reggee Bonoan