Biktima ng paputok umakyat na sa 839

UMAKYAT na sa 839 ang bilang ng naitalang naputukan ng firecrackers sa pagsalubong sa bagong taon.

Ito ang iniulat ng Department of Health (DoH), batay sa pumasok na impormasyon sa nakalipas na magdamag.

Nananatiling mas mababa ito ng isang porsiyento o katumbas ng 11 insidente kung ihahambing sa record sa kaparehong araw noong nakaraang taon.

Gayonman, aminado ang DoH na hindi pa sila maaaring maging kampante dahil bukas pa ang huling araw sa pagbibilang kaya maaari pa itong madagdagan.

Una nang inianunsiyo ng kagawaran na bumaba nang mahigit sa 50 porsiyento ang firecracker related cases ngayong taon para sa pagsalubong sa 2016, bagay na kinontra ng ilang kritiko.