26 sugatan sa bus na nahulog sa bangin

NAGA CITY – Sugatan ang 26 katao makaraang mahulog ang isang pampasaherong bus sa bangin sa Brgy. Bagong Silang, Calauag, Quezon, pasado 11:30 p.m. kamakalawa.

Ayon kay PO3 Arnel Asares ng PNP-Calauag, biyaheng Maynila galing Bicol ang Mega Bus Line na minamaneho ni Felicito Avelida nang mawalan ng kontrol at mahulog sa bangin.

Pinaniniwalaang nakatulog ang driver ng bus na naging daan upang mawala sa kontrol.

Agad dinala sa ospital ang 26 mula sa 48 pasahero ng bus na nasugatan.

Ayon kay Asares, siyam na lamang ang nananatili ngayon sa ospital at ang 17 ay nakalabas na.

Kung maaalala, noong nakaraang Sabado lamang nang maaksidente rin ang isang bus sa bayan ng Sariaya na nagresulta sa pagkasugat ng 42 pasahero at isa ang namatay.