26 pasahero ng jeep na tinangay sa Basilan nasagip ng pulisya

ZAMBOANGA CITY – Ligtas na narekober ng mga pulis ang 26 pasahero ng isang public utility jeepney (PUJ) na napaulat na tinangay ng armadong kalalakihan kasama ng kanilang sinasakyan sa Brgy. Pipil, Ungkaya Pukan, Basilan kamakalawa.

Sa report mula sa Ungkaya Pukan municipal police station, nagmula ang naturang sasakyan sa munisipyo ng Tumahubong kamakalawa lulan ang agricultural products at papunta sana sa bayan nang harangin ng ilang aramdong lalaki.

Tinangay ng mga suspek ang sasakyan gayondin ang lahat ng mga pasahero ngunit makalipas ang anim na oras ay nakita sila ng nagrespondeng mga pulis ng Ungkaya Pukan municipal police station.

Napag-alaman, ang sasakyan (JCM 930) ay minamaneho ni Mambik Uyong, 31-anyos, at pag-aari ng isang Mukim H. Mahilul, 50.

Base sa inisyal na imbestigasyon ng pulisya, posibleng carnapping ang motibo ng mga suspek.

Ayon sa Western Mindanao Command (WestMinCom), napag-alaman nilang away mag-asawa lamang ang dahilan sa insidente.

Hindi anila sinaktan ng armadong mga lalaki ang mga pasahero.

Patuloy na inaalam ng mga awtoridad kung ano talaga ang unay na motibo ng mga salarin sa insidente.