Itaas ang diskurso sa politika

SA susunod na buwan, papasok na ang campaign period at inaasahang higit na magiging matindi ang mga batikusan at siraan sa panig ng magkakalabang politiko.

Ang iba’t ibang anyo ng black propaganda ay mangyayari at malamang maging ang pamilya ng bawat kandidato ay madamay sa eleksiyong ito.

Nakalulungkot,  imbes pagtuunan ng pansin ang kani-kanilang mga plataporma de gobyerno, higit na nasesentro ang kampanya ng mga kandidato sa kung papaano nila sisirain ang kanilang mga kalaban sa politika.

Kailangang maitaas ang diskurso sa politika. Itigil ang batikusan at siraan, at sa halip ipaliwanag ng bawat kandidato ang kanilang mga programa na pakikinabangan ng taumbayan sakaling sila ay mahalal.

Ang mga nagbabangayang kandidato na tumatakbo sa pagkapangulo ay hindi magandang ehemplo sa taumbayan. Nagbibigay rin ito ng lakas ng loob sa mga kandidato sa lokal na posisyon na gawin ang mga maling pamamaraan ng kampanya dahil ito ang nakikita nila sa mga tumatakbo sa pagkapangulo at iba pang posisyon sa national level.

Nasa taumbayan din ang pagpapasya.  Nasa kamay ng bawat Filipino kung sino ang karapat-dapat na ihalal nilang kandidato. Maging mapanuri at matalino sa pipiliing kandidato para sa isang tunay na lingkod-bayan.