5-anyos nene patay, 26 nalason sa buko juice

BACOLOD CITY – Patay ang 5-anyos batang babe habang 26 iba pang menor de edad ang naospital makaraang malason sa ininom na buko juice sa bayan ng Calatrava, sa Negros Occidental, kamakalawa.

Batay sa kompirmasyon ni Negros Occidental health officer, Dr. Ernell Tumimbang, ang buko juice ang dahilan ng pagkahilo ng mga biktima na inihain sa Christmas party ng nasa ikalawang baitang sa kanilang paaralan.

Ang biktima ay namatay sa kanilang bahay sa Brgy. Maaslob sa nasabing bayan.

Napag-alaman, ang buko juice na ininom ng biktima ay dala ng kanyang ate na galing sa party.

Sinasabing nilagnat at nagsuka ang biktima ngunit hindi  ipinagamot ng kanyang mga magulang.

Ang ibang biktimang karamihan may edad na pito hanggang walo ay isinugod sa pagamutan nang makaranas ng pananakit ng tiyan, mataas na lagnat at dehydration dalawang araw makaraan ang party.