Boga ng ‘igan nakalabit, senglot tigok

PATAY ang isang 43-anyos lalaki nang aksidenteng makalabit ang gatilyo ng baril ng kanyang kaibigan sa Tondo, Maynila kahapon.

Binawian ng buhay habang dinadala sa Ospital ng Tondo ang biktimang si Rogelio Dalida, 43, ng 2127 V. Serrano St., Tondo, Maynila.

Sa imbestigasyon ni PO3 Michael Maraggun, imbestigador ng MPD-Homicide Section, dakong 2 p.m. nang maganap ang insidente sa loob ng isang bahay sa 2130 Interior 13, S. Trinidad St., sa nasabing lugar.

Dakong 7 a.m. habang nakikipag-inoman ang biktima sa ilang kapitbahay nang dumating isang kaibigan na may dalang hindi nabatid na kalibre ng baril.

Habang kausap ang biktima kaugnay sa papasukang trabaho ay ipinagyabang ng lalaki ang kanyang baril.

Kinuha ng biktima ang baril, inusisa ito at pabirong itinutok sa kanyang ulo ngunit biglang pumutok.

Kasalukuyang inaalam pa ng mga awtoridad ang pagkakakilanlan ng lalaking may-ari ng baril na tumakas makaraan ang insidente.